Negosyo, Now Na! (Abante)

NEGOSYO, NOW NA!: Kahit binagyo nang todo, tuloy ang negosyo

Mga Kanegosyo, si Mang Toto Andres ay isang dating driver at nagtrabaho rin bilang magsasaka sa kanilang bayan sa Aklan.

Upang makadagdag sa kita, pumasok siya bilang ahente ng furniture sa kanilang lugar kung saan siya ay nag-aalok ng ­ginagawang kasangkapan tulad ng mesa o silya sa mga residente sa kanilang lugar at mga kalapit na bayan.

Madalas, pinagagalitan sila ng mga bumili dahil kumpleto na ang bayad ngunit hindi pa naidi-deliver ang mga order na furniture sa due date.

Kaya naisipan ni Mang Toto na magsimula ng sarili niyang furniture shop dahil nakita niya ang potensyal na kumita mula rito.

Sa isang maliit na lugar lang sinimulan ni Mang Toto ang shop. Gawa sa pawid ang dingding nito habang isang maliit na mesa ang nagsilbing gawaan niya ng furniture.

Kinakantiyawan nga ng kanyang mga kaibigan ang puwesto ni Mang Toto dahil sa sobrang liit nito.

Ngunit tiniyaga ni Mang Toto ang nasimulang negosyo hanggang lumago ito at naging lima silang gumagawa ng iba’t ibang kasangkapan.

***

Subalit noong 2013, naglahong lahat ang pinaghirapan ni Mang Toto at kanyang mga kasama sa paghagupit ng Bagyong Yolanda sa kanilang lugar.

Ni isang gamit ay walang natira sa kanila kaya wala nang paraan para sila’y muling makapagsimula. Nawalan na rin ng pag-asa si Mang Toto na makabangon pa.

 

Isang taon ang lumipas, nagkasundo silang lima na ­ituloy ang kanilang nasimulang negosyo kahit kaunti lang ang kanilang kitain.

Noong July 14, 2016, nakumbida si Mang Toto ng isang staff ng DTI-Aklan magpunta sa Negosyo Center sa Altabas para dumalo sa isang talakayan ukol sa pagnenegosyo.

Sa una, inakala ni Mang Toto na biro lang ang lahat kaya doon siya pumuwesto sa likuran ng seminar at pasilip-silip lang kung ano ang nangyayari.

Nang magsalita na ang isang staff ng Negosyo Center, naengganyo si Mang Toto na makinig at nahikayat nang manatili sa kabuuan ng seminar.

Napaganda pa ang pagpunta ni Mang Toto dahil nalaman niya na nakatakda ring magbigay ng seminar si Reggie Aranador, isang sikat na tagadisenyo ng furniture.

Sa unang araw ng seminar, natuto si Mang Toto sa tamang paggamit ng kahoy at paggawa ng kasangkapan mula sa scrap na kahoy. Sa ganda ng seminar, naisip ni Mang Toto na dalhin ang iba pa niyang kasama sa shop.

Nalaman din nina Mang Toto ang tama at mabilis na paggawa ng mirror frame at wood lamp sa loob lang ng dalawang araw.

Hanga si Mang Toto sa sistema ng pagtuturo ni Reggie dahil lahat ng nais nilang malaman ay itinuro sa kanila.

Bilib din si Mang Toto sa ganda ng serbisyo ng mga taga-Negosyo Center sa Aklan. Aniya, isandaang porsyento ang ibinibigay nilang tulong sa mga nais magsimula ng negosyo.

Sa Negosyo Center din nakilala ni Mang Toto si Julie Antidon ng SB Corporation, kung saan napag-alaman niyang tumutulong sa pagpapahiram ng puhunan sa maliliit na negosyo.

Sa ngayon, patuloy ang paglakas ng negosyong furniture shop ni Mang Toto  na ngayo’y kilala na bilang Toto’s Woodcraft.

***

Higit sa 500 na ang mga Negosyo Center sa Pilipinas salamat sa Republic Act No. 10644 o Go Negosyo Act, ang kauna-unahan kong naipasang batas bilang senador noong 16th Congress.

Layunin nitong maglagay ng Negosyo Center sa bawat munisipalidad, siyudad, at lalawigan sa buong bansa upang suportahan ang mga Pilipino na nais magsimula ng sariling negosyo o tulungang mapalaki ang kasalukuyan nilang negosyo.

Upang malaman ang pinakamalapit na Negosyo Center sa inyong lugar, magtungo sa https://www.bamaquino.com/gonegosyoact/negosyo-center-tracker/.

NEGOSYO, NOW NA!: Pampalipas oras naging negosyo

Mga kanegosyo, walang pinipiling edad ang pagiging negos­yante. Gaya na lang ni Aling Milagros­ Hipolito ng San Jose City, Nueva Ecija na nagbigyan ng pagkakataong makapagpatayo at magpaunlad ng negosyo.

Sa halos 12 taon, nagtrabaho si Aling Milagros bilang guro. Nagturo siya ng ilang subjects gaya ng Mathematics, Physics, Computer at Technology Livelihood Education.

Noong 2009, nagpasya si Aling Mila na iwan ang pagiging guro at samahan ang asawa’t mga anak sa Cabiao, Nueva Ecija.

Dahil sanay na nagtatrabaho, nainip si Aling Mila sa araw-araw na panonood ng TV, paggawa ng gawaing bahay at paghihintay sa asawa at anak na umuwi galing sa opisina at paaralan.

Bilang libangan at pampalipas-oras, naisip ni Aling Mila na gumawa ng mga maliliit na damit mula sa panggagantsilyo.

Upang malaman ang mga bagong istilo sa paggagantsilyo at mga produkto na maaaring gawin sa pamamagitan nito, tumi­ngin siya sa Internet at doon niya nakita ang paraan ng paggawa ng cellphone cases, coin purse, baby booties at swim suits. Tinawag ni Aling Mila ang kanyang mga produkto na ­Gawang Kabyawenyo.

Nakita naman ng kanyang mister ang potensiyal ng mga produktong gawa ng misis kaya nagpasya silang i-display ito sa Kabyawan Festival noong Pebrero 2015. Nagulat ang mag-asawa dahil naging paborito ng mga dumalo ang kanilang mga produkto. Halos lahat ng kanilang paninda ay nabili at uma­bot sa P5,000 ang kanilang kinita sa loob lang ng isang araw.

Nang i-post naman ng kanyang anak sa Facebook ang mga produktong gawa ni Aling Mila, hindi nito intensiyon na maghanap ng customer kundi ipakita lang ang libangan ng pamilya.

Ngunit dinagsa sila ng order mula sa mga kaibigan at ­kamag-anak para sa kanilang koleksiyon at souvenir tuwing may birthday o binyagan.

*** 

 

Nang magbukas ang Negosyo Center sa Cabiao, isa si Aling Mila sa mga naimbitahan upang bigyan ng payo ang iba pang entrepreneurs na nais magsimula ng negosyo.

Dahil hindi pa sapat ang kaalaman sa pagnenegosyo, dumalo­ rin si Aling Mila sa ilang seminar at training na bigay ng Negosyo Center.

Kabilang sa mga seminar na ito ang Design Mission, How to Start a Small Business, Go Negosyo Act, Barangay Micro Business Enterprise Law, Developing Mindset of Successful Entrepreneurs at Product Labeling and Packaging.

Ginawa na ring pormal ni Aling Mila ang kanyang negosyo­ sa pamamagitan ng pagpaparehistro nito sa tulong ng Negosyo Center. Ngayon, kilala na ang kanyang negosyo bilang Gawang­ Kabyaweño-Handicrafts.

Naka-display na rin sa Negosyo Center ang ilang produkto na gawa ni Aling Mila para makita ng mga bumibisita rito.

Kahit malapit nang maging senior citizen, natutuwa si Aling Mila at nabigyan siya ng panibagong pagkakataong kumita at makatulong sa pamilya.

Nagpapasalamat din si Aling Mila sa Negosyo Center sa pagbibigay sa kanya ng lakas ng loob na harapin ang hamon ng pagnenegosyo.

***

Higit sa 500 na ang mga Negosyo Center sa Pilipinas salamat sa Republic Act No. 10644 o Go Negosyo Act, ang kauna-unahan kong naipasang batas bilang senador.

Layunin nitong maglagay ng Negosyo Center sa bawat munisipalidad, siyudad at lalawigan sa buong bansa upang suportahan ang mga Pilipino na nais magsimula ng sariling negosyo o tulungang mapalaki ang kasalukuyan nilang negosyo.

Upang malaman ang pinakamalapit na Negosyo Center sa inyong lugar, magtungo sa https://www.bamaquino.com/gonegosyoact/negosyo-center-tracker/.

NEGOSYO, NOW NA!: Ex-OFW may patok nang negosyo

Mga kanegosyo, madalas ay nahihirapan ang ating overseas Filipino worker (OFWs) na makakita ng hanapbuhay sa Pilipinas kapag natapos ang kanilang kontrata.

Ang iba, matagal na naghihintay ng panibagong pagkakataon para makabalik sa ibang bansa at makapaghanapbuhay.

Kung minsan, ang iba sa kanila ay hindi na makakabalik sa ibang bansa at nananatiling walang trabaho o anumang pagkakakitaan sa Pilipinas dahil sa kakulangan ng oportunidad.

Ito ang isa sa mga problemang nais tugunan ng Negosyo Center. Nais nating mabigyan ng pagkakataong makapagsimula ng bagong negosyo ang ating mga bayaning OFW upang hindi na sila kailangang mangibang bansa pa para lang makapaghanapbuhay.

***

Ganito ang kuwento ni Butch Pena, na bumalik sa bansa nang matapos ang kanyang trabaho sa abroad.

Habang naghihintay sa panibagong kontrata, naghanap si Butch at asawang si Gilda ng ibang pagkakakitaan upang matugunan ang pangangailanan at pag-aaral ng kanilang mga anak.

Ayon sa mag-asawa, nais nilang patunayan na mayroong oportunidad ang mga nagbabalik na overseas Filipino worker (OFWs) na magkahanapbuhay sa Pilipinas.

Isang araw, napansin ni Aling Gilda ang anunsiyo ng Go Negosyo sa Facebook para sa libreng negosyo seminar noong Mayo 2016.

Agad nagpalista ang mag-asawa at masuwerte namang napili sila para makadalo sa ilang serye ng seminar.

 

Sa mga nasabing seminar, nakilala nila si Jorge Weineke ng Kalye Negosyo habang nagsilbing “Angelpreneur” ng mag-asawa sina Dean Pax Lapid, Butch Bartolome, Mon Abrea at Armand Bengco at marami pang iba.

Sa pagitan ng mga nasabing seminar, binuo ng mag-asawa ang kanilang business concept at plano.

***

Noong June 2016, nagtungo ang mag-asawa sa Negosyo Center Mandaluyong, ang kauna-unahang Negosyo Center sa National Capital Region, kung saan ipinakilala sila ni Mr. Weineke kay Flor para sila’y matulungan sa pagkuha ng DTI trade name.

Sa tulong ni Jen, na tauhan ng Negosyo Center Mandaluyong, nakuha rin ng mag-asawa ang pangalan ng bago nilang negosyo  ang Standalone Fashion Boutique – sa mismong araw ring iyon.

Kasunod nito, nabigyan rin ang mag-asawa ng BMBE certification sa tulong ng Negosyo Center.

Sa pamamagitan rin ng Negosyo Center at Kalye Negosyo, pormal nang naipakilala ang mag-asawa sa mundo ng negosyo.

Kabi-kabila ang mga dinaluhang seminar ng mag-asawa, na tumatalakay sa iba’t ibang aspekto ng pagnenegosyo.

Sa tulong ng mga seminar na ito, nagkaroon ng sapat na kaalaman at sapat na kumpiyansa ang mag-asawa upang simulan na ang kanilang negosyong pagbebenta ng damit.

***

Unang sumabak ang mag-asawa sa 15th Franchise Expo ng AFFI sa World Trade Center noong Oktubre ng nakaraang taon.

Sa nasabing expo, dinagsa ng mga tao ang kanilang booth para bumili ng produkto. Ang iba naman, nagtanong kung paano sila makakapag-franchise.

Gamit ang karanasan mula sa 15th Franchise Expo, sumali rin sa ilang Christmas bazaar ang mag-asawa.

Pagkatapos, gumawa rin sila ng Facebook account, upang maipakilala pa sa mas maraming tao ang kanilang mga produkto.

Nagkaroon rin ng bagong ideya and mag-asawa na gumawa ng SFB Fad Truck, o isang sasakyan na puno ng mga damit na maaari nilang dalhin sa iba’t ibang lugar para mailapit sa mamimili ang kanilang mga produkto.

Umaasa ang mag-asawa na mas magtatagumpay ang negosyo nila kapag naipatayo na nila ang fad truck, lalo pa’t armado na sila ng sapat na kaalaman mula sa mga seminar na ibinigay sa kanila ng Negosyo Center.

***

Higit sa 500 na ang mga Negosyo Center sa Pilipinas salamat sa Republic Act No. 10644 o Go Negosyo Act, ang kauna-unahan kong naipasang batas bilang senador noong 16th Congress.

Layunin nitong maglagay ng Negosyo Center sa bawat munisipalidad, siyudad at lalawigan sa buong bansa upang suportahan ang mga Pilipino na nais magsimula ng sariling negosyo o tulungang mapalaki ang kasalukuyan nilang negosyo.

Upang malaman ang pinakamalapit na Negosyo Center sa inyong lugar, magtungo sa https://www.bamaquino.com/gonegosyoact/negosyo-center-tracker/.

NEGOSYO, NOW NA!: Produkto mula sa turmeric

Mga kanegosyo, ilang linggo ang nakalipas ay bumisita ako sa Negosyo Center sa Iligan City.
Makikita ito sa loob ng Mindanao State University Iligan Institute of Technology (MSU-IIT).

Sa aking pagbisita, nakita ko kung paano nakakatulong ang digital fabrication laboratory o FabLab sa paglikha ng disenyo ng mga produkto ng entrepreneurs na lumalapit sa Negosyo Center.

Nakausap ko rin ang ilang entrepreneurs na mula Iligan City, na regular nang kliyente ng Negosyo Center.

***

Isa na rito si Aling Antonieta Aragan, na maagang nabiyuda kaya mag-isa lang na binubuhay ang tatlong anak sa pamamagitan ng benepisyo mula sa Pantawid Pamilya Pilipino Program o 4Ps.

Sa umpisa, walang negosyo si Aling Antonieta at umaasa lang sa tulong ng 4Ps. Minsan, naisip nilang mag-loan sa Sustainable Livelihood Program (SLP), kasama ang iba pang miyembro ng kanilang asosasyon sa lugar para makapagsimula ng negosyong turmeric at luya.

Sa umpisa, mabagal ang pasok ng benta dahil hindi pa kilala ang kanilang produkto sa merkado.

Isang araw, niyaya siya ni Francis Flores, project development officer ng SLP, na magtungo sa Negosyo Center sa Iligan City upang ipakilala kay Ma’am Lourdes Tiongco.

Pinayuhan naman ni Ma’am Lourdes si Aling Antonieta na sumali sa iba’t ibang seminar at event ng Negosyo Center para makatulong sa paglago ng kanyang negosyo.

Doon na nagsimula ang pagdalo ni Aling Antonieta sa iba’t ibang seminar ng Negosyo Center.

 

Sa kagustuhang matuto, nakarating pa siya sa Cagayan de Oro City para lang dumalo sa seminar.

Tinulungan din siya ng Negosyo Center sa pagdisenyo ng label at packaging upang maka-engganyo ng maraming mamimili sa merkado.

***

Nakatulong din ang Mentor Me Program ng DTI para mabigyan ng lakas ng loob at tiwala sa sarili si Aling Antonieta para magnegosyo.

Sa kuwento niya, natuto siya sa Mentor Me Program kung ano ang tamang gawin sa negosyo at kung ano ang mga pagkakamali na dapat iwasan.

Pati pagsunod sa legal na proseso ay itinuro kay Aling Antonieta upang hindi magkaroon ng problema sa hinaharap.

***

Sa ngayon, mayroon nang display ang mga produkto ni Aling Antonieta sa DTI at sa iba’t ibang supermarket sa lungsod at mga kalapit na lugar, gaya ng Cagayan de Oro, Cotabato City at maging sa Cebu City.

Ibinida rin sa akin ni Aling Antonieta na nakaabot na sa Amerika ang kanyang produkto nang dalhin ito ng tiyahin ng kanyang kaibigan.

Pagbalik ng asawa nito mula Amerika, may dala na itong maraming order para sa kanyang mga produkto.

Sa una, kumita si Aling Antonieta ng P1,000, P3,000 hanggang sa umakyat ito ng P6,000 kada buwan. Noong Abril, pumalo sa P12,000 ang kanyang kita.

Malaki ang naitulong ng kanyang maliit na negosyo sa pangangailangan ng pamilya. Noon, sinabi ni Aling Antonieta na problema niya ang pagkain sa araw-araw.

Ngayon, dahil sa regular na kita ng kanyang mga produkto ay tiyak na mayroon silang pagkain sa mesa at pampaaral sa kanyang mga anak.

Bilang panghuli, pinasalamatan ni Aling Antonieta ang bumubuo sa Negosyo Center sa Iligan City dahil sa kanilang tulong upang mapaganda ang kanyang buhay.

Ayon kay Aling Antonieta, kung hindi sa Negosyo Center ay hindi siya magkakaroon ng kumpiyansa sa sarili at kaalaman na magagamit sa kanyang negosyo.

Mahalaga ang papel ng Negosyo Center sa pag-asenso at pag-angat ng maliliit na negosyo at sa paglaban sa kahirapan.

Inaasahan natin na ang mga Negosyo Center sa Iligan at Marawi City ay makatutulong sa paghanap ng kabuhayan para sa mga pamilyang naapektuhan ng labanan sa Marawi at mga kapalit pang lugar.

***

Higit sa 500 na ang mga Negosyo Center sa Pilipinas salamat sa Republic Act No. 10644 o Go Negosyo Act, ang kauna-unahan kong naipasang batas bilang senador noong 16th Congress.

Layunin nitong maglagay ng Negosyo Center sa bawat munisipalidad, siyudad at lalawigan sa buong bansa upang suportahan ang mga Pilipino na nais magsimula ng sariling negosyo o tulungang mapalaki ang kasalukuyan nilang negosyo.

Upang malaman ang pinakamalapit na Negosyo Center sa inyong lugar, magtungo sa https://www.bamaquino.com/gonegosyoact/negosyo-center-tracker/.

NEGOSYO, NOW NA!: Negosyong techie

Mga kanegosyo, isa sa mga dahilan kung bakit isinusulong ko ang libreng internet sa mga pampublikong lugar sa iba’t ibang bahagi ng bansa ay puwede itong pagkunan ng trabaho at pagsimulan ng negosyo.

Kapag naratipikahan ng dalawang sangay ng Kongreso ang pinal na bersiyon ng panukala, pirma na lang ni Pangulong Duterte ang kailangan upang ito’y ma­ging batas.

Kapag mayroong internet ang isang Pilipino, naririyan ang oportunidad para makakita ng hanapbuhay, makapagsimula ng online business o iba pang negosyo na may kinalaman sa teknolohiya.

Ganito ang nangyari kina Gian Javelona ng OrangeApps Inc. at Juan Miguel ‘JM’ Alvarez ng Potatocodes, dalawang technopreneur o negosyante na gumagamit ng teknolohiya sa kanilang negosyo.

Masuwerte tayo at nakasama natin sila sa prog­ramang ‘Go Negosyo sa Radyo’ noong Miyerkules kung saan ibinahagi nila ang kuwento ng kanilang tagumpay.

Sa kuwento ni JM, sinimulan niya ang Potatocodes noong 2014 sa edad na 20-anyos. Isa sa mga hamon na kanyang naranasan ay ang kawalan ng karanasan. Ngunit naisipan pa rin niyang gumawa ng mobile app sa sariling pagsisikap at pag-aaral.

Nagbunga naman ang pagtitiyaga ni JM dahil nakabuo siya ng app matapos ang isang buwang pag-aaral. Isa sa mga mobile app na na-develop niya ay ang FormsPH, na kanyang ipinamamahagi nang libre at ngayo’y may 15,000 downloads na.

Ayon kay JM, ginawa niyang libre ang Forms­PH bilang mensahe sa mga kapwa millenials na gumawa ng solusyon sa halip na magreklamo nang magreklamo. Ngayon, nakatutok ang serbisyo ng Potatocodes sa paggawa ng website.

Para kay JM, hindi dapat isipin ang kabiguan at hindi rin dapat gamiting dahilan ang kakulangan ng kaalaman para hindi maabot ang isang bagay.

***

 

Sa parte naman ni Gian, sinimulan niya ang OrangeApps gamit lang ang laptop at cellphone. Ayon kay Gian, naisip­an niyang simulan ang kompanya at gumawa ng app para sa enrollment matapos pumila ng tatlo hangggang apat na oras para maka-enroll.

Nagdisenyo siya ng app gamit ang website at mobile kung saan mapapatakbo ng isang paaralan ang operasyon nito sa online enrollment, tuition fee monitoring, at schedule ng mga klase.

Isa sa mga naging hamon sa pagsisimula niya ay kung paano makukuha ang tiwala ng mga paaralan na gumawa ng app para sa kanila. Unang nagtiwala kay Gian ay ang Polytechnic University of the Philippines (PUP) hanggang sa ito’y nasundan pa ng iba pang unibersidad.

Nang tanungin kung bakit ito ang napili niyang pangalan sa kompanya, sinabi ni Gian na “kung may Apple, gusto ko magkaroon ng Orange”.

Ayon kay Gian, ang pangunahing nagtulak sa kanya para simulan ang kompanya ay ang pagnanais na mapabuti ang sistema.

Para kay Gian, mas mabuting unahin muna ang pangarap dahil susunod na rito ang kita.

Nagsisilbi ring inspirasyon ni Gian ang pagkakataong makapagbigay ng trabaho sa mas maraming tao sa pamamagitan ng kanyang kompanya.

***

Mga kanegosyo, ano ang pagkakatulad nina Gian at JM? Pareho silang nag­hanap ng solusyon sa mga problema na kanilang naranasan at kinaharap.

Maliban pa rito, pareho rin silang natuto sa panonood ng YouTube kung paano mag-code o mag-program. Si JM, inabot lang ng isang buwan para matutong gumawa ng app.

Ito ang tatak ng isang entrepreneur. Naghaha­nap ng so­lusyon sa mga problema at nagbibigay ng sagot sa mga panga­ngailangan sa kanyang kapaligiran.

Sa paghahanap nila ng solusyon sa problema, nakapagsimula sila ng negosyo na parehong nagdala sa kanila tungo sa tagumpay.

NEGOSYO, NOW NA!: Umasenso sa basura

Mga kanegosyo, pa­milyar ba kayo sa kasa­bihang ‘may pera sa basura’?

Nagkatotoo ang kasa­bihang ito kay Aling Pamfila Menor Mariquina, na tubong Boac, Marinduque.

Ang pagbili ng mga babasagin at plastic na bote at iba pang kalat ng mga kapitbahay ang na­ging tulay ni Aling Pam­fila tungo sa tagumpay.

***

Isinilang si Aling Pamfila sa Boac noong Hunyo 29, 1955. Sa batang edad, natuto na si Aling Pamfila na maghanap-buhay.

Sinasabayan ni Aling Pamfila ang pag-aaral ng pagtitinda ng kakanin sa kanilang lugar upang may maipambaon at makatulong sa gastusin sa bahay.

Dahil sa hirap, elementarya lang ang natapos ni Aling Pamfila at napilitan nang tumi­gil sa pag-aaral. Nana­tili na lang siya sa bahay upang tumulong sa mga ­gawain. Kung minsan, naglalako siya ng kakanin para may maidag­dag sa kanilang panga­ngailangan.

Nang tumuntong siya sa edad na 15, ­lumuwas si Aling Pamfila sa Maynila upang mamasukan bilang katulong. Kahit sanay sa gawaing bahay, nahirapan pa rin si Aling Pamfila dahil malayo sa pamilya.

Matapos ang ilang buwan, lumipat si Aling Pamfila sa Tanay at doon namasukan bilang alalay ng dentista.

Nang makaipon, nagbalik si Aling Pamfila sa Marinduque at nagtayo ng maliit na sari-sari store sa kanilang lugar.

 

Ngunit nagkaproblema si Aling Pamfila dahil sa halip na makabenta, puro utang ang ­ginawa ng kanyang mga kapitbahay. Dahil walang maibayad ang mga nangutang, agad ding nagsara ang kanyang munting negosyo.

 ***

Noong 1987, muling nagpasya si Aling Pamfila na subukang muli ang pagnenegosyo upang makatulong sa asawa sa gastos sa bahay at apat nilang anak.

Gamit ang isandaang pisong puhunan, nagsi­mula siyang magbenta ng sigarilyo, palamig, at biskwit. Unti-unti niyang inipon ang kinita hanggang sa makapagtayo muli ng sari-sari store.

Noong 1998, nakilala ni Aling Pamfila ang CARD. Noong una’y ayaw siyang pasalihin ng asawa ngunit nang ipaliwanag niya ang mga benepisyo at oportunidad na maaaring ibigay ng CARD, naintindihan ito ng mister at pinayagan na siyang sumali.

Naging masaya at makabuluhan para kay Aling Pamfila ang pagsali sa CARD dahil hindi lamang pinansiyal na tulong ang naibigay sa kanya nito kundi pati determinasyon na mapaunlad pa ang negosyo.

Ginamit ni Aling Pamfila ang nautang na P3,000 sa CARD bilang pandagdag sa kanyang tindahan. Inipon niya ang kita ng tindahan at ipi­nambili ng ilang baboy.

Noong 2006, naisipan ni Aling Pamfila na magsimula ng isang junk shop sa kanilang lugar dahil nakita niya na madali itong pagkakitaan at maraming kapitbahay niya ang makikinabang.

Ginamit niya ang pe­rang ipinahiram ng CARD bilang pambili ng kala­kal. Kasabay ng ­paglago ng kanyang negosyo, tumaas din ang panga­ngailangan ni Aling Pamfila sa kapi­tal, na agad namang ipi­nagkaloob sa kanya ng CARD nang walang anumang kola­teral.

Sa tulong ng kanyang negosyo, nakapagpagawa rin si Aling ­Pamfila ng dalawang boarding house at nakapagpundar ng rental business kung saan nagpapaupa siya ng videoke, upuan, at mesa para sa mahahalagang okasyon.

Nakabili siya ng ma­raming lupa sa kanilang lugar na may mga tanim na niyog at napatapos ang apat niyang anak sa kolehiyo.

Sa kasalukuyan, hinu­hubog ni Aling ­Pamfila ang kanyang mga anak sa pagpapatakbo ng kani­lang negosyo, sa tulong na rin ng mga seminar na ibinibigay ng CARD.

***

Itinuturing na pinakamalaking microfinance institution sa bansa, nagpapautang ang CARD-MRI ng puhunan sa mga nais magsimula ng negos­yo nang walang kolateral at sa mababang interes.

Mayroon na ­silang iba’t ibang sangay sa Pili­pinas, na ­makikita sa kanilang ­website na www.cardmri.com at ­www.cardbankph.com.

***

Ang Republic Act No. 10644 o Go Negosyo Act ang kauna-una­hang kong batas bilang senador noong 16th Congress. Layunin nito na maglagay ng Negosyo Center sa bawat munisipalidad, siyudad at lalawigan sa buong bansa.

Upang malaman ang pinakamalapit na Negosyo Center sa inyong lugar, magtungo sa https://www.bamaquino.com/gonegosyoact/negosyo-center-tracker/.

NEGOSYO, NOW NA!: Madramang buhay ni Aling Susan

Mga kanegosyo, si Aling Susan Bantilla ay tubong Padada, Davao del Sur. Kung pakikinggan ang kuwento ng kanyang madramang buhay, puwede itong gawing telenovela na siguradong susubaybayan ng mara­ming Pilipino.

Itinakwil si Aling ­Susan ng mga magulang dahil sa kagustuhan niyang mag-aral. Paniwala kasi ng kanyang mga magulang, hindi na sila kailangang mag-aral dahil pag-aasawa lang ang kanilang kahahantungan.

Sa pagpupumilit niyang makatapos sa kolehiyo, pinalayas siya ng mga magulang at napi­li­tang mangibang-­bayan. Sa kanyang pagsisikap, nakatapos si Aling ­Susan ng kursong Bachelor of Science in Agriculture Business.

Makalipas ang ilang taon, nakapag-asawa si Aling Susan at nabiya­yaan ng tatlong anak. Ngunit nasira ang kanyang pamilya nang su­mama sa isang kulto ang kanyang asawa at dinala sa bundok ang tatlo nilang anak.

Sa kuwento ni Aling Susan, plano ng ­kanyang mister na ihandog sa pinuno ng grupo ang ka­nilang bunso na noo’y sanggol pa lang. Mabuti na lang at nailigtas ni Aling Susan ang kanyang mga anak ngunit hindi ang asawa. Mula noon, hindi na niya ito nakita.

Lumipat si Aling Susan at mga anak sa Tacurong sa Sultan Kudarat. Doon niya nakilala ang lalaki na muling nagpatibok ng kanyang puso at tumayong ama ng kanyang mga anak.

Subalit noong Nob­yembre 23, 2009, nada­may ang kanyang asawa sa mga napaslang sa Maguindanao Massacre sa Maguindanao. Sa imbes­tigasyon, napagkamalan ang kanyang asawa na kasama ng mga pulitiko kaya ito pinaslang.

Sa nangyaring ito, naiwan si Aling Susan na walang katuwang sa pagtataguyod sa kanyang mga anak.

***

Isang araw, inalok siya ng kaibigan na du­malo sa seminar ng CARD sa kabilang lugar. Matapos ang ilang ­beses na pagdalo, noong 2010 ay nagmiyembro na si Aling Susan at ­ginamit ang unang loan na P5,000 para makapagsimula ng sariling negosyo.

 

Ginamit niya ang nautang na pambili ng magaganda at imported na bulaklak at iba’t iba pang halaman at nagsimula ng maliit na flower shop. Sa kanyang pagsisikap at sa gabay na rin ng mga semi­nar ng CARD, napalago niya ang negosyo.

Nagkaroon na rin siya ng dalawang puwesto na kumikita ng hindi bababa sa P30,000 kada linggo.

Maliban sa pagpapatayo ng sarili niyang bahay, nakapagpatayo rin siya ng paupahang apartment at nakabili na rin ng videoke na kanyang pinaparentahan sa tulong ng dagdag na loan mula sa CARD.

Ngunit ang pinakamalaking biyaya para kay Aling Susan ay ang mapag-aral ang kanyang mga anak sa magandang paaralan at maibigay ang lahat nilang panganga­ilangan. Nagkaayos na rin sila ng kanyang mga magulang na matagal niyang hindi nakita at nakausap.

Bilang pagtanaw ng utang na loob sa tulong ng CARD, sumasama si Aling Susan sa mga semi­nar kung saan ibina­bahagi niya ang kanyang buhay at karanasan sa pagnenegosyo.

***

Itinuturing na pinakamalaking microfinance institution sa bansa, nagpapautang ang CARD-MRI ng puhunan sa mga nais magsimula ng negos­yo nang walang kolateral at sa mababang interes.

Mayroon na silang iba’t ibang sangay sa Pili­pinas, na ­makikita sa kanilang website na www.cardmri.com at www.cardbankph.com.

***

Ang Republic Act No. 10644 o Go Negos­yo Act ang kauna-una­han kong batas bilang senador noong 16th Congress. Layunin nito na maglagay ng Negosyo Center sa bawat munisipalidad, siyudad, at lalawigan sa buong bansa.

Upang malaman ang pinakamalapit na Negosyo Center sa ­inyong lugar, magtungo sa https://www.bamaquino.com/gonegosyoact/negosyo-center-tracker/.

NEGOSYO, NOW NA!: Kuwento ni Aling Almira (2)

Mga kanegosyo, ga­ya nang aking naipangako, itutuloy natin ang kuwento ni Aling Almira Beltran, na aking nakilala nang bumisita ako sa Negosyo Center sa Cabanatuan City kamakailan.

Ang karanasan ni Aling Almira ay magandang inpirasyon para sa mga kababayan nating nais magsimula ng negosyo.

Napagtagumpayan ni Aling Almira ang ma­tinding dagok sa ­kanyang buhay at ngayo’y isa nang may-ari ng matagumpay na Almira’s Beads Work na nakabase sa San Jose, Nueva Ecija.

***

Habang ­nagtatrabaho sa bilangguan, ­kumita si Aling Almira ng 150 ­riyals bilang allowance para sa kanyang mga pa­ngangailangan. Sa kan­yang pagsisikap, naka­ipon siya ng 1,700 riyals na katumbas ng P23,500 noon.

Makalipas ang wa­long buwang pag­kabilanggo, nabigyan ng par­don si Aling ­Almira at nagbalik sa ­Pilipinas noong February 24, 2016.

Agad siyang nagtu­ngo sa OWWA upang ipaalam ang nangyari sa kanya sa Riyadh. Nakuha naman niya ang isang buwang suweldo mula sa OWWA na nagkakaha­laga ng P15,000.

Ginamit niya ang ipon para buhayin ang kanyang negosyong bea­ded bags. Namili siya ng sampung libong ­pisong halaga ng mater­yales sa Quiapo at kumuha ng hu­lugang ­sewing machine.

***

Nabalitaan ni Aling Almira na may bubuksang Pasalubong Center sa San Jose kaya agad siyang lumapit kay Darmo Escuadro, Tourism ­Officer ng siyudad, upang malaman ang requirements para makapag-display siya ng mga produkto sa Center.

 

Kasabay nito, ­lumapit si Aling Almira sa ­Negosyo Center sa siyudad noong July 28, 2016 para magparehistro ng business name at iba pang dokumento tulad ng Mayor’s Permit at BIR registration.

Dahil kumpleto na sa papeles, nakapag-display na si Aling Almira ng mga produkto sa Pasalubong Center at nakasama pa sa ilang trade fair ng DTI sa lalawigan.

Noong August 10, 2016, kumita si Aling Almira ng P6,140 sa Gatas ng Kalabaw Trade Fair sa San Jose City. Sumali rin siya sa Diskuwento Caravan ng DTI at kumita ng P4,440.

Sa anim na araw na trade fair sa Science City of Munoz, nakapag-uwi si Aling Almira ng P9,955. Noong Nobyembre ng nakaraang taon, kumita siya ng kabuuang P22,980.

Maliban sa pagpaparehistro at pagpapakilala ng kanyang produkto sa merkado, tinulungan din ng Negosyo Center si Aling Almira na ­lumago ang kaalaman sa pag­ne­negosyo.

Inimbitahan siya sa iba’t ibang seminar na tumatalakay sa iba’t ibang aspeto ng pagnenegosyo, tulad ng Effective Business Negotiation and Selling Technique, Pro­duct Development, Simple Bookkeeping, Business Continuity Planning at Personal Finance.

Sa tulong ng Negosyo Center, nagkaroon si Aling Almira ng bagong lakas upang ipursige ang kanyang pangarap na magkaroon ng sa­riling negosyo.

Sa nga­yon, pinag-aaralan na ni Aling Almira kung paano maibebenta ang kanyang produkto sa ibang bansa.

***

Ang Republic Act No. 10644 o Go Negosyo Act ang kauna-una­han kong batas bilang senador noong 16th Congress.

Layunin nitong mag­lagay ng Negosyo Center sa bawat munisipalidad, siyudad at lalawigan sa buong bansa upang suportahan ang mga Pilipino na nais magsimula ng sariling negosyo o tulungang mapalaki ang kasalukuyan nilang negosyo.

Upang malaman ang pinakamalapit na Negosyo Center sa ­inyong lugar, magtungo sa https://www.bamaquino.com/gonegosyoact/negosyo-center-tracker/.

NEGOSYO, NOW NA!: Kuwento ni Aling Almira (1)

Mga kanegosyo, noong unang linggo ng Abril ay nagtungo tayo sa Cabana­tuan, Nueva Ecija para magsalita sa graduation ng Nueva Ecija University of Science and Technology (NEUST).

Bago po ako nagtungo sa graduation ng NEUST, dumaan ako sa Negosyo Center sa siyudad na makikita sa ikalawang palapag ng CAL Bldg. sa General Tinio Street.

Ito’y isa sa limang Negosyo Centers sa makikita sa lalawigan. Mayroon din tayong Negosyo Center sa Palayan City, Cabiao, San Jose at Gapan. Nakatakda ring magbukas ngayong taon ang isa pang Negosyo Center sa Science City of Munoz.

***

Sa aking pagbisita sa Negosyo Center sa Cabanatuan, nakausap natin ang mga business counselor na nagbibigay ng payo sa mga negosyante na humihingi ng tulong.

Nakadaupang-palad din natin ang mga may-ari ng ilang negosyo sa lalawigan, kabilang na si Aling Almira Beltran, na kilalang gumagawa ng bags at iba pang produkto gamit ang iba’t ibang disenyo ng beads sa siyudad ng San Jose.

Kasal si Aling Almira kay Mang Reynaldo Beltran at nabiyayaan sila ng tatlong anak na babae.

Natutong magnegosyo si Aling Almira noong siya’y Grade 6 pa lang. Sa impluwensiya ng mga kapitbahay, naengganyo siya at ang kapatid na si Laarni na gumawa ng bags, bracelet at key chains gamit ang beads.

Ibinibenta ng magkapatid ang mga natatapos nilang produkto sa paaralan at sa palengke.

Ang napagbentahan, ginagamit nilang pandagdag sa gastos sa bahay at kanilang pag-aaral.

 

Nakadalawang taon lang si Almira sa kolehiyo bago lumipat sa kursong Computer Secretarial sa Central Luzon State University. Pagkatapos, nakilala niya si Mang Reynaldo at sila’y nagpakasal.

Noong 2012, nadestino si Mang Reynaldo sa Antique kaya napilitan silang lumipat doon.

Pagkatapos ng ilang taon, bumalik sila sa San Jose City at ipinagpatuloy ang paggawa ng beaded bags at mga bagong produkto tulad ng cellphone holders at coin purse.

***

Noong 2014, nagpasya si Aling Almira na tumigil sa paggawa ng beaded bags at sinubukan ang suwerte sa pagtatrabaho sa ibang bansa. Namasukan siya bilang domestic helper sa Riyadh.

Makalipas ang siyam na buwang pagtatrabaho sa Gitnang Silangan, malaking pagsubok ang tumama kay Aling Almira nang akusahan siyang may relasyon sa driver ng kanyang amo.

Kahit walang katotohanan ang akusasyon, nakulong si Aling Almira nang hindi nalalaman ng kanyang pamilya.

Kabilang sa mga kinumpiska ng amo ay ang kanyang cellphone kaya hindi siya makatawag sa pamilya sa Pilipinas upang ipaalam ang kanyang sinapit.

Nalungkot man sa nangyari, pero hindi pa rin pinanghinaan ng loob si Aling Almira. Noong June 28, 2015, sa tulong ng kapwa Pilipino na nakalaya noong araw na iyon, nakapagpadala siya ng sulat sa pamilya.

Habang nakakulong, ginamit ni Aling Almira ang oras para magtrabaho sa loob ng piitan.

Limang buwan din siyang naging tagalinis at tatlong buwan na nag-volunteer sa paggawa ng handicraft, tulad ng key chain, gamit ang Swarovksi bilang pangunahing materyales.

Sa susunod nating kolum, ipagpapatuloy natin ang kuwento ng pagbangon ni Aling Almira mula sa mabigat na pagsubok.

***

Ang Republic Act No. 10644 o Go Negosyo Act ang kauna-unahan kong batas bilang senador noong 16th Congress.

Layunin nitong maglagay ng Negosyo Center sa bawat munisipalidad, siyudad at lalawigan sa buong bansa upang suportahan ang mga Pilipino na nais magsimula ng sariling negosyo o tulungang mapalaki ang kasalukuyan nilang negosyo.

Upang malaman ang pinakamalapit na Negosyo Center sa inyong lugar, magtungo sa https://www.bamaquino.com/gonegosyoact/negosyo-center-tracker/.

NEGOSYO, NOW NA!: Pagtatanim ng tubo at Internet shop

Mga kanegosyo, kilala si Pasencia Iglesia o Nanay Pasing bilang masipag at tapat na Barangay Kagawad sa Brgy. Banay-Banay, Bayawan City, Negros Oriental.

Sa Negros Occidental isinilang si Nanay Pasing ngunit lumipat sa Negros Oriental nang nasa ika-apat na baitang na siya sa elementarya.

Doon na rin natapos ni Nanay Pasing ang high school bago niya nakilala ang mister na si Jonnary.

Upang mabuhay ang apat nilang anak, nagnegosyo ang mag-asawa ng baboy at nagtanim ng tubo, na siyang pangunahing pananim ng Negros.

Naging maayos naman ang takbo ng negosyo ng mag-asawa ngunit noong 2007, matinding pagsubok ang tumama sa kanilang pamilya at kabuhayan.

Matinding tagtuyot o El Niño ang tumama noon sa rehiyon, na nakaapekto nang husto sa kanilang tubuhan.

Sinikap nilang isalba ang mga pananim subalit karamihan sa mga ito ay hindi na napakinabangan dahil natuyo sa sobrang init.

Sa una, sinubukan munang manghiram ng mag-asawa sa buyer ng kanilang tubo para maisalba ang kabuhayan.

Makalipas ang isang taon, naibangon ng mag-asawa ang negosyo at nabayaran ang lahat ng kanilang utang.

***

 

Makalipas ang ilang taon, muli na namang nalagay sa alanganin ang tubuhan ni Nanay Pasing nang magkulang ang pambili nila ng abono.

Eksakto naman na kabubukas lang ng CARD sa kanilang lugar at inanyayahan siyang sumali ng kaibigan.

Dahil sa ganda ng patakaran, maliban pa sa iba’t ibang benepisyo gaya ng tulong sa pagpapa-aral sa kanyang mga anak, nahikayat si Nanay Pasing na sumali.

Ginamit ni Nanay Pasing ang nahiram na pera bilang pambili ng abono, na siyang muling nagbigay daan sa pagbangon ng kanilang negosyo.

***

Napansin din ni Nanay Pasing ang problema ng kanyang anak sa pag-aaral dahil walang computer shop sa kanilang lugar.

Kailangan pang dumayo ng kanyang anak sa ibang barangay para makagawa ng assignments sa paaralan.

Naisipan ni Nanay Pasing na magtayo ng Internet shop sa kanilang lugar. Sa tulong ng pautang ng CARD, naumpisahan niya ang maliit na computer shop sa kanilang barangay.

Kamakailan lang, nagdagdag pa si Nanay Pasing ng labinlimang computer sa shop na pinatatakbo ng anak na si Joy.

Sa tulong ng CARD, nagsimula na rin ang pagpapatayo sa isa pang negosyo ng mag-asawa — ang Muscovado Milling, na makatutulong sa pagpapalakas ng kanyang negosyong tubo.

Mula sa pagtatanim ng tubo hanggang sa kanilang Internet shop, naging katuwang ni Nanay Pasing ang CARD sa paglalakbay tungo sa pag-asenso.

***

Itinuturing na pinakamalaking microfinance institution sa bansa, nagpapautang ang CARD-MRI ng puhunan sa mga nais magsimula ng negosyo nang walang kolateral at sa mababang interes.

Mayroon na silang iba’t ibang sangay sa Pilipinas, na makikita sa kanilang website na www.cardmri.com at www.cardbankph.com.

***

Ang Republic Act No. 10644 o Go Negosyo Act ang kauna-unahang batas ko bilang senador noong 16th Congress. Layunin nito na maglagay ng Negosyo Center sa bawat munisipalidad, siyudad at lalawigan sa buong bansa.

Upang malaman ang pinakamalapit na Negosyo Center sa inyong lugar, magtungo sa https://www.bamaquino.com/gonegosyoact/negosyo-center-tracker/.

Scroll to top