Negosyo Tips

NEGOSYO, NOW NA!: Susi sa tagumpay

Mga Kanegosyo, isang manigong bagong taon sa inyong lahat!

Nawa’y maging makabuluhan at masagana ang 2015 para sa inyo at inyong mga pamilya.

Ang bagong taon ay isang pagkakataon para sa isang bagong simula.

Isa rin itong magandang pagkakataon upang makapag-umpisa ng bagong negosyo o kabuhayan na maaaring ma­ging susi natin sa tagum­pay sa hinaharap.

***

Sa aking karanasan sa pagnenegosyo at pagiging social entrepreneur bago maging isang senador, marami na akong nakitang negosyo na nagtagumpay o di kaya’y sumablay.

Ang pagnenegosyo ay parang giyera. Ito’y isang larangan na nangangaila­ngan ng tamang pag-aaral, diskarte at sapat na kaalaman upang magtagumpay.

Kung basta lang tayo sasabak nang walang anumang kaalaman o ka­handaan, tiyak na pupulutin tayo sa kangkungan.

Sa kolum na ito, tata­lakayin natin ang mga katangiang taglay ng isang matagumpay na negos­yante at ang mga tamang hakbang at susi tungo sa pagpapaunlad ng inyong pinapangarap na negosyo.

***

Una sa mahabang listahan ng mahahalagang bagay para pumatok ang negosyo ay ang location. Location, location, location.

Kailangan ang lugar ng pagnenegosyohan ay madaling puntahan o madaling makita ng mga mamimili. Susi ang magandang location sa ikatatagumpay ng negosyo.

Kahit gaano pa kaganda ang isang produkto, kung nakapuwesto ito sa lugar na hindi kita, hindi dinadayo ng mga mamimili o walang foot traffic, tiyak na lalangawin at malulugi lang ito.

***

Isang magandang halimbawa ang ginawa ng Island Souvenirs, isang kilalang souvenir shop na sinimulan ni Jay Aldeguer noong 1992 sa Cebu.

Nag-aaral pa lang ay nahilig na si Jay sa negos­yo. Habang nasa eskuwela, nagbebenta siya ng t-shirt sa mga kaklase sa likod ng sasakyan.

Nahilig din si Jay sa pangongolekta ng t-shirt sa kanyang pagbiyahe sa iba’t ibang bansa. Ngunit sa kanyang pag-iikot sa iba’t ibang tourist spots sa Pilipinas, wala siyang makitang de-kalidad na t-shirt na puwedeng ipasalubong ng mga turista.

Dito naisipan ni Jay na simulan ang Island Souvenir.

Upang makasabay sa marami pang katulad niyang tindahan, nagpuwesto si Jay sa mga lugar na madalas dinarayo ng mga turista. Maliban dito, naglagay rin siya ng tindahan sa mga patok na mall.

Ngayon, mayroon na itong mahigit isandaang sangay sa iba’t ibang tou­rist locations sa bansa.

Alalahanin ninyo, mahalaga ang lokasyon. Mas madaling puntahan o matagpuan, mas malaki ang kita.

 

First Published on Abante Online

NEGOSYO, NOW NA!: Bukas na isip

Mga Kanegosyo, sa pagdating ng Hunyo, patapos na tayo sa unang kalahati ng taon. Kumusta na ang ating pinapatakbong negosyo? Sana’y nakatutulong kami sa pagpapalago ng inyong pangkabuhayan sa mga kuwento at tips na tinatalakay natin sa kolum na ito.

Ngayong linggo, pag-usapan natin ang kahalagahan ng isang bukas na isip sa mga pagbabagong nangyayari sa ating mundo sa kasalukuyan.

Mga Kanegosyo, kung sarado ang ating isipan sa mga bago at sariwang ideya, sistema at mga bagay-bagay, tiyak na mapag-iiwanan tayo sa mabilis na takbo ng buhay.

Sa pagnenegosyo, kapag sarado ang ating isip sa mga suhestiyon, bagong ideya o ‘di kaya’y modernong sistema, tiyak na kakain tayo ng alikabok sa mga kakumpitensya sa merkado.

Hindi lang basta nagmamasid sa merkado tayong mga negosyante; naghahanap din tayo ng makabagong ideya upang mapaganda ang negosyo sa pamamagitan ng pagbabasa at pananaliksik.

Maituturing na bukas ang isip ng isang negosyante kung handa tayong tumanggap ng panukala, komento at mga tanong sa produkto at serbisyo natin.

Magandang kumuha ng mga bagong ideya sa kapalirigan, sa ating mga tauhan, pamilya, mga kaibigan, ang ating mga suki at maging ang mga kakumpitensya.

Makakakuha rin ng mga bagong ideya mula sa mga aklat, magazine, video, newsletter, seminar at sa Internet.

***

Kapag galing sa isang bigong pag-ibig, ang iba sa atin ay bumibiyahe sa malalayong lugar upang doon magpalipas ng sama ng loob, makapag-isip-isip at makapagpahinga.

Ganito ang pinagdaanan ni Cathy Brillantes-Turvill. Galing siya sa bigong pag-ibig at naghanap ng paglilibangan para malayo ang isip sa pait na nararamdaman.

Upang makalimot, naging madalas ang pagpunta niya sa isang kumbento sa Tagaytay upang doon magdasal at magmuni-muni.

Sa madalas niyang pagbalik-balik sa Tagaytay, napansin niya na walang spa sa nasabing lugar na makatutulong sa kanyang makapagpahinga.

Nagkataong nakilala ni Cathy ang isang British chemist na si Dr. Mike Turvill, na supplier ng essential oils sa mga spa sa five-star hotel sa Metro Manila.

Nabanggit niya ang ideya kay Mike, na siya namang kumumbinsi sa kanya na ituloy ang pangarap na negosyo, na ngayo’y kilala bilang Nurture Spa.

Sinimulan niya ang bagong negosyo, na mayroon lang dalawang kuwarto. Nang tumagal, lumaki ang spa, na ngayo’y mayroon ng anim na gazebo, siyam na indoor massage rooms, apat na native huts, pitong airconditioned rooms at isang seminar room.

Kahit matagumpay na, bukas pa rin ang isip niya sa mga pagbabago sa industriya. Parati siyang nagsasaliksik at sumasali sa mga conference upang matutunan ang makabagong technique sa pagmamasahe at pagpapatakbo ng spa, bukod sa pakikinig sa mga komento ng kanyang mga customer.

Hindi lang naging naging bukas ang isip niya sa pagnenegosyo. Naging bukas din ang kanyang puso kay Mike, na siyang naging asawa niya.

Kaya mga Kanegosyo, kapag bukas tayo sa mga bagay-bagay, tunay na walang limit ang daan tungo sa tagumpay!

 

 

First Published on Abante Online

 

 

 

NEGOSYO, NOW NA!: Expertise

Mga Kanegosyo, noong nakaraang linggo, tinalakay natin ang kaha­lagahan ng ­integridad sa pagnenegosyo — na ang pagiging tapat sa pag­pa­patakbo nito at ang hindi panloloko ng mga mamimili at supplier ang isa sa mga susi para magtagal at maging matagum­pay ang ating mga negos­yo.

Ngayong linggo nama­n, pag-usapan natin ang tungkol sa ­pagiging bihasa natin sa ­larangan na ating papasukin upang mas maging malaki ang bentahe ng itatayo ­nating negosyo o pagkaka­ki­taan.

Mas mahirap kasing magsimula at umasenso kung wala tayong alam o mangangapa pa sa negosyong itatayo. Baka mas matatagalan ang pag-a­ngat ng negosyo kung hindi kabisado ang linya ng papasukin.

Halimbawa, kung ang linya natin ay may ­kaalaman sa ­computer ngunit laundry shop ang ating papasukin, mas maraming detalye ang kailangang ­pag-aaralan bago magkaroon ng gamay sa pagpapatakbo ng isang laundry shop.

Sa isang artikulo sa Forbes.com, isa sa mga website na tumatalakay sa matatagumpay na negosyo, ang pagiging bihasa sa larangan ay ang pinakamalaking sandata ng isang entrepreneur.

Sa paliwanag ng nagsulat na si Kevin Ready, isang negosyante, manunulat at marketing specialist, kapag bihasa na tayo sa larangang pinasok, makakabisado na ang pasikot-sikot nito at mas madali nang malusutan ang kahit anong uri ng problema.

Maliban dito, ­dahil alam na ang sistema ng pagpapatakbo sa negos­yo, mas madali nang mailalatag at mapagha­handaan ang mga plano’t programa para sa hinaharap.
Magiging kabisado na rin ang galaw ng merkado; mas madali nang makapag-adjust sa mga produkto o serbisyo na ipapasok.

Puwede rin namang pumasok sa mga negosyong wala tayong karanasan. Mas magiging malaki nga lang ang kailangang habulin.

***

Natapos ni Dra. Vicky Belo ang Bachelor of Science sa UP Diliman noong 1978 at nakumpleto ang kanyang degree sa Medicine and Surgery sa University of Sto. Tomas noong 1985.

Nagtrabaho muna siya ng isang taon bilang resident doctor sa Makati Medical Center bago pinursige ang kanyang diploma sa Dermatology mula sa Institute of Dermatology sa Bangkok, Thailand noong 1990.

Pagbalik niya ng Pilipinas, sinimulan niya ang pangarap na magtayo ng sariling clinic para sa liposuction at laser sa isang 44-metro kuwadradong espasyo sa Medical Towers sa Makati.

Malaking sugal ang ginawa niya dahil noong mga panahong iyon, bihira lang ang mayroong ganitong uri ng klinika sa bansa at kakaunti pa lang ang may interes na suma­ilalim sa tinatawag na enhancement.

Sa una, mabagal ang dating ng kliyente dahil puro mayayaman lang ang nagpupunta sa clini­c niya.
Ngunit ­dalawang ling­go ang nakalipas mula nang buksan niya ang klinika, bumisita ang isang sikat na singer na kanyang naging regular na kliyente at modelo.

Kumuha rin siya ng isang publicist na isa ring kilalang TV host upang ipakilala sa madla ang kanyang klinika.
Mula noon, sabi nga nila, the rest is history. Dahil eksperto si Dra. Belo sa kanyang negosyo, maraming serbisyo ang kanyang nailabas para sa merkado.

Dalawampu’t limang taon ang nakalipas, malayo na ang narating ng Belo Medical Group. Ito na ang itinuturing bilang numero unong medical aesthetic clinic sa bansa.
Mula sa maliit na klinika sa Makati, nga­yon ay mayroon nang siyam na klinika sa Metro Manila at tig-isang klinika sa Cebu at Davao.

Basta’s bihasa sa larangan na papasukin, hindi na mangangapa at kadalasan, mas magiging mabilis pa ang pag-angat ng negosyo!

 

First Published on  Abante Online

 

 

NEGOSYO, NOW NA!: Mahabang Pasensiya

Mga Kanegosyo, noong naka­raang linggo, pinag-usapan natin ang kahalagahan ng sariling interes sa pagnenegosyo upang magtagumpay ang ating pinatatakbong negosyo.

 

Kung nasa isip natin ang ating ginagawa o mayroon tayong enterprising mindset, masasamantala nating ang magagandang pagkakataon upang mapalaki ang ating kita.

 

Ngayong linggo, pag-uusapan naman natin ang mahabang pagpapasensiya, na isang mahalagang katangian sa pagnenegosyo.

 

Mahalaga na mayroon tayong mahabang pisi habang pinalalaki pa natin ang ating negosyo, lalo na sa pagpapaikot ng pera. Sa una, mukhang wala nang katapusan ang gastos dahil puro palabas lang nang palabas.

 

Naririyan ang pagbili ng mga gamit para sa opisina tulad ng computer at printer, mesa at upuan, sasakyan para sa delive­ry at ‘di inaasahang gastos tulad ng repair ng puwestong rerentahan.

 

Kailangang tipirin at balansehin ang mga gastos habang hindi pa kumikita. Baka malunod sa gastos at lalo lang tayong maubusan ng pasensiya sa bagal ng pagpasok ng pera.

 

Isa pang realidad sa pagpapapasensiya ang kailangan na­ting tanggapin — hindi lahat ng naisip nating negosyo ay baka pumatok at makagawa kaagad ng marka sa merkado.

 

Kung maikli ang pasensiya ng isang negosyante, hindi na ito magtitiyagang maghintay pa bago makilala ang kanyang negosyo o produkto. Isasara na lamang niya ito at baka hindi na sumubok ng iba pa.

 

***

 

Tulad na lang ni Justin Uy, may-ari ng Profood Internationa­l Corporation na nakabase sa Cebu City.

 

Noong Dekada ‘70, sinubukan niyang pumasok sa negosyo sa murang edad na 15-anyos para makatulong sa ama’t ina at 10 kapatid.

 

Una, pinasok nito ang shell crafting bago sinubukan ang paggawa ng fashion jewelry, manukan, pagtatanim ng kabute at iba’t iba pang maliliit na negosyo.

 

Maliban sa kulang sa puhunan, hindi rin nagtagal ang kanyang mga negosyo dahil sa kawalan ng maganda at matibay na merkado.

 

Sa negosyo naman niyang manukan, naubos din ang kapi­tal niya dahil kinailangan pa niyang gumastos sa patuka ng mga manok. Bukod pa rito, matagal pa ang paghihintay bago mangitlog ang mga manok.

 

Noong Dekada ‘80, napansin nito na nagkalat ang mangga sa kanilang lugar at hindi pinapansin ng mga magsasaka dahil walang gustong bumili.

 

Kung patuyuin kaya niya ang mga manggang nakakalat? Pinasok niya ang pagtitinda ng dried mangoes, na kalat na sa Cebu noon pang ­Dekada ‘50 ngunit karamihan sa mga ito’y home-based lang.

 

Doon na nagsimul­a ang Profood Inter­natio­nal Corporation.

 

Dahil latecomer na sa dried mangoes industry, nahirapan siyang pasukin ang lokal na merkado. Kaya ibinenta niya ito sa Europe, United States at Japan.

 

Ngunit hindi ito na­ging madali para sa kanya dahil mahirap para sa isang papasimula pa lang na kumpanya ang magbenta ng produkto sa isang maunlad na bansa.

 

Sa halip na mawalan ng loob, gumawa siya ng ilang mga hakbang para maging katanggap-tanggap ang kumpanya sa ­international market.

 

Pinasok niya ang toll packing para sa ibang kumpanya tulad ng Del Monte, Nestle at Coca-Cola.

 

Maliban pa rito, ginawa niyang moderno ang kanyang planta at tinuruan ang kanyang mga tauhan ukol sa international standards ng pagpoproseso ng produkto para makakuha ng international certification.

 

Tatlumpu’t apat na taon ang binuno niya bago nailagay ang Profood International Corporation bilang pinakamalaking dried fruit producer sa country.

 

Mula sa mangga, nasa 15 nang tropical fruits ang kanilang pinapatuyo at ibinebenta. Target din nito na makapaglabas ng walong bagong produkto sa mga susunod na taon.

 

Kung naubos lang ang pasensiya ni Justin sa mga pagsubok na kanyang naranasan, hindi niya maabot ang titulong “Dried Mango King” ng Pilipinas.

 

First published on Abante

 

 

Scroll to top